തിരുവനന്തപുരം: കൊവിഡ് വ്യാപനത്തിന്റെ പശ്ചാത്തലത്തില്‍ ആളുകള്‍ രക്തം ദാനം ചെയ്യാന്‍ എത്താതായതോടെ ബ്ലഡ് ബാങ്കുകളില്‍ ക്ഷാമം. പതിനെട്ട് വയസിന് മുകളിലുള്ളവര്‍ക്ക് കൂടി വാക്‌സിന്‍ നല്‍കാന്‍ ആരംഭിച്ചാല്‍ സ്ഥിതി കൂടുതല്‍ വഷളാകുമെന്ന ആശങ്കയിലാണ് ആരോഗ്യപ്രവര്‍ത്തകര്‍.
കൂടുതലായും യുവാക്കളാണ് രക്തം ദാനം ചെയ്യുന്നത്. എന്നാല്‍ വാക്‌സിന്‍ സ്വീകരിച്ചുകഴിഞ്ഞാല്‍ ഉടന്‍ രക്തം നല്‍കാനാവില്ല. രണ്ട് ഡോസും എടുത്ത് 28 ദിവസങ്ങള്‍ക്ക് ശേഷം മാത്രമേ രക്തം ദാനം ചെയ്യാനാകു. ഇതിന് കുറഞ്ഞത് മൂന്ന് മാസമെങ്കിലുമെടുക്കും. അതിനാല്‍ത്തന്നെ പതിനെട്ട് വയസിന് മുകളിലുള്ളവരുടെ വാക്‌സിനേഷന്‍ ആരംഭിക്കുന്നതിന് മുമ്ബ് തന്നെ ആവശ്യത്തിന് രക്തം ശേഖരിക്കാനുള്ള പരിശ്രമത്തിലാണ് ആരോഗ്യ വകുപ്പ്
രോഗവ്യാപനത്തിന്റെ പശ്ചാത്തലത്തില്‍ രക്ത ദാന ക്യാമ്ബുകള്‍ സംഘടിപ്പിക്കാനാകുന്നില്ല. കൊവിഡ് പകരുമോ എന്ന് പേടിച്ചാണ് പലരും രക്തം ദാനം ചെയ്യാന്‍ എത്താത്തത്. രക്തദാനത്തിലൂടെ രോഗം പകരില്ലെന്ന് ഡോക്ടര്‍മാര്‍ ഉറപ്പ് നല്‍കുന്നുണ്ടെങ്കിലും ജനങ്ങളുടെ ആശങ്ക മാറുന്നില്ലെന്നതാണ് സ്ഥിതി വഷളാക്കുന്നത്.
