മഴ ശക്തമായതോടെ മുല്ലപ്പെരിയാര് ഡാമിലെ ജലനിരപ്പില് വര്ധന. ശനിയാഴ്ച രാവിലെയോടെ ജലനിരപ്പ് 134. 90 അടിയായി ഉയര്ന്നു.
മഴ ശക്തമായി തുടരുന്നതിനാല് ജലനിരപ്പ് ഇനിയും ഉയരുമെന്നാണ് റിപ്പോര്ട്ട്. ജലനിരപ്പ് അപ്പര് റൂള് ലെവലിലെത്തിയാല് സ്പില് വേ ഷട്ടര് തുറന്നേക്കുമെന്നാണ് സൂചന.
അതിനാല് പെരിയാര് തീരത്തുള്ളവര് ജാഗ്രത പാലിക്കണമെന്നും നിര്ദേശം നല്കിയിട്ടുണ്ട്. റൂള് കര്വ് അനുസരിച്ച് ജൂലൈ 19 വരെ 136. 30 അടിയാണ് അണക്കെട്ടില് പരമാവധി സംഭരിക്കാവുന്ന ജലനിരപ്പ്. നിലവില് 1844 ഘനയടി വെള്ളമാണ് തമിഴ്നാട് മുല്ലപ്പെരിയാറില് നിന്ന് കൊണ്ടു പോകുന്നത്.
എന്നാല് സെക്കന്റില് 7000 ഘനയടിയിലധികം വെള്ളമാണ് അണക്കെട്ടിലേക്ക് ഒഴുകിയെത്തുന്നത്. ജലനിരപ്പ് ഉയരുന്ന പശ്ചാത്തലത്തില് മഞ്ചുമല വില്ലേജ് ഓഫീസില് കണ്ട്രോള് റൂം തുറന്നു. ആശങ്കപ്പെടേണ്ട സാഹചര്യമില്ലെന്നും ജാഗ്രത പാലിച്ചാല് മതിയെന്നും ജില്ലാ കളക്ടര് വ്യക്തമാക്കി.
അതേസമയം സംസ്ഥാനത്ത് ഇന്നും പരക്കെ മഴയ്ക്ക് സാധ്യതയെന്ന് കാലാവസ്ഥാ കേന്ദ്രത്തിന്റെ റിപ്പോര്ട്ട്. ഒറ്റപ്പെട്ടയിടങ്ങളില് ശക്തമായ മഴ ലഭിക്കുമെന്നാണ് റിപ്പോര്ട്ട്. കൂടുതല് മഴ വടക്കന് ജില്ലകളില് തന്നെയായിരിക്കും. ഇതിനെ തുടര്ന്ന് ആറ് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്.
