വത്തിക്കാൻ സിറ്റി: ആഗോള മിഷണറി പ്രവർത്തനങ്ങൾക്ക് സമർപ്പിതമായ മിഷൻ ഞായർ ആചരണം ഈ വർഷവും പതിവുപോലെതന്നെ ആചരിക്കുമെന്ന് വത്തിക്കാന്റെ സ്ഥിരീകരണം. ഒക്ടോബർ മാസത്തിലെ അവസാന ഞായറിനു തൊട്ടുമുമ്പുള്ള ഞായറാണ് ആഗോള സഭ മിഷൻ ദിനം ആചരിക്കുന്നത്. അതുപ്രകാരം ഈ വർഷം ഒക്ടോബർ 18നാണ് മിഷൻ ഞായർ. ജനതകളുടെ സുവിശേഷവത്കരണത്തിനുള്ള പൊന്തിഫിക്കൽ കൗൺസിലാണ് ഇക്കാര്യം സ്ഥിരീകരിച്ചത്.കോവിഡ് മഹാമാരിയെ തുടർന്ന് കത്തോലിക്കാ സഭയുമായി ബന്ധപ്പെട്ട നിരവധി ദിനാചരണങ്ങൾ മാറ്റിവെക്കുകയും റദ്ദാക്കുകയും ചെയ്ത സാഹചര്യത്തിൽ മിഷൻ ഞായർ ആചരണവുമായി ബന്ധപ്പെട്ട് നിരവധി സംശയങ്ങൾ പല ഭാഗത്തുനിന്നും ഉയർന്നിരുന്നു. ആ സാഹചര്യത്തിലാണ് മിഷൻ ദിനാചരണത്തിന് നേതൃത്വം നൽകുന്ന ലോക സുവിശേഷവത്ക്കരണ തിരുസംഘം ഔദ്യോഗിക അറിയിപ്പ് പുറപ്പെടുവിച്ചത്. ‘ഇതാ ഞാൻ, എന്നെ അയച്ചാലും,’ എന്ന തിരുവചനമാണ് ഇത്തവണത്തെ ആപ്തവാക്യം.മിഷണറിമാരുടെ മധ്യസ്ഥയായ ലിസ്യുവിലെ വിശുദ്ധ കൊച്ചുത്രേസ്യയുടെ തിരുനാളോടെ (ഒക്ടോ. ഒന്ന്) ആരംഭിക്കുന്ന ഒക്ടോബർ മാസത്തിലെ സുപ്രധാന ദിനമാണ് മിഷൻ ഞായർ. 1926ൽ പയസ് 11-ാമൻ പാപ്പയാണ് ആഗോളമിഷൻ ഞായർ ആഘോഷങ്ങൾക്ക് തുടക്കം കുറിച്ചത്. കത്തോലിക്കാ സഭയിൽ മിഷൻ ചൈതന്യം ഉണർത്തി, ലോകമെമ്പാടുമുള്ള സുവിശേഷവൽക്കരണ പ്രവർത്തനങ്ങളെ ആത്മീയമായും സാമ്പത്തികമായും സഹായിക്കുകയാണ് മിഷൻ ഞായർ ദിനാചരണത്തിന്റെ ലക്ഷ്യം.
- മരിയ ഷഹാബസിനെ കണ്ടുകിട്ടിയ ശേഷമുള്ള ഫോട്ടോ
- പി എസ് സി റാങ്ക് ലിസ്റ്റീൽ ഉണ്ട് പക്ഷെ ജോലി ഇല്ല..യുവാവ് മനം നൊന്ത് ജീവനൊടുക്കി
