ബംഗാൾ ഉൾക്കടലിൽ ഞായറാഴ്ച ന്യൂനമർദം രൂപപ്പെടുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.. മഹാരാഷ്ട്ര തീരത്തുനിന്ന് പ്രവഹിക്കുന്ന ന്യൂനമർദ പ്രവാഹം ഞായറാഴ്ചയോടെ ആന്ധ്രാ തീരത്ത് എത്തിച്ചേരും.ബംഗാൾ ഉൾക്കടലിൽ ആന്ധ്ര തീരത്താണ് ന്യൂനമർദം രുപപ്പെടുന്നത്.
തിങ്കളാഴ്ചവരെ കേരളത്തിൽ ചില ജില്ലകളിൽ അതിശക്തമായ മഴ പെയ്യുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ഇന്ന് മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിൽ അതിശക്തമായ മഴയ്ക്കു സാധ്യതയുള്ളതിനാൽ ഓറഞ്ച് അലർട്ട് പ്രഖ്യാപിച്ചു. ഇന്ന് ആലപ്പുഴ, കോട്ടയം, എറണാകുളം, ഇടുക്കി, തൃശൂർ, പാലക്കാട് ജില്ലകളിലും നാളെ എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിലും 13-ന് ആലപ്പുഴ, എറണാകുളം, തൃശൂർ, പാലക്കാട്, മലപ്പുറം കോഴിക്കോട്, കണ്ണൂർ, കാസർഗോഡ് ജില്ലകളിലും ഞായറാഴ്ച ആലപ്പുഴ, എറണാകുളം തൃശൂർ, പാലക്കാട്, മലപ്പുറം, കോഴിക്കോട്, കണ്ണൂർ, കാസർഗോഡ് ജില്ലകളിലും 14-ന് ആലപ്പുഴ, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, കണ്ണൂർ, കാസർഗോഡ് ജില്ലകളിലും യെല്ലോ അലർട്ട് പ്രഖ്യാപിച്ചു.
മത്സ്യത്തൊഴിലാളികൾക്ക് ജാഗ്രതാ നിർദേശം
തിരുവനന്തപുരം: ബംഗാൾ ഉൾക്കടലിൽ മഹാരാഷ്ട്ര തീരത്തു നിന്ന് ആന്ധ്ര തീരത്തേക്ക് ന്യൂനമർദ പ്രവാഹമുള്ളതിനാൽ ബംഗാൾ ഉൾക്കടൽ പ്രക്ഷുബ്ധമാണെന്നും മത്സ്യത്തൊഴിലാളികൾ ജാഗ്രത പാലിക്കണമെന്നും കേന്ദ്ര കാലാവസ്ഥാ വകുപ്പു മുന്നറിയിപ്പ് നൽകി.
ഇന്നലെ രാത്രി മുതൽ ബംഗാൾ ഉൾക്കടൽ പ്രക്ഷുബ്ധമാണ്. പൊഴിയൂർ മുതൽ കാസർഗോഡ് വരെ തിരമാലകൾ 2.5 മുതൽ 3.3 മീറ്റർവരെ ഉയരും.
