തിരുവനന്തപുരം: 2021 ലെ കേരള സംസ്ഥാന ചലച്ചിത്ര പുരസ്കാര പ്രഖ്യാപനം നാളെ വൈകിട്ട് അഞ്ച് മണിയ്ക്ക് സാംസ്കാരിക വകുപ്പു മന്ത്രി സജി ചെറിയാന് നിര്വഹിക്കും.
142 സിനിമകളാണ് ഇത്തവണ സംസ്ഥാന ചലച്ചിത്ര പുരസ്കാരങ്ങള്ക്കു വേണ്ടി സമര്പ്പിക്കപ്പെട്ടത്. ഇവയില് ഏഴെണ്ണം കുട്ടികളുടെ ചിത്രങ്ങളാണ്. സൂപ്പര് താരങ്ങളുടെ കൊമേഴ്സ്യല് ചിത്രങ്ങള്ക്കൊപ്പം സമാന്തരസിനിമകളും ഇത്തവണ മത്സരത്തിനുണ്ട്. ഒരുപിടി നവാഗത സംവിധായകരുടെ ചിത്രങ്ങങ്ങളും താര രാമാനുജന്, ഇന്ദു വി എസ്, വിധു വിന്സെന്റ് തുടങ്ങിയ വനിതാ സംവിധായകരുടെ ചിത്രങ്ങളും ഈ വര്ഷം സംസ്ഥാന ചലച്ചിത്ര പുരസ്കാരത്തിനായി മത്സരിക്കുന്നുണ്ട്.
ഹിന്ദി സംവിധായകനും തിരക്കഥാകൃത്തുമായ സയ്യിദ് അഖ്തര് മിര്സ ചെയര്മാനായ ജൂറിയാണ് അവാര്ഡുകള് നിര്ണയിച്ചത്. സംവിധായകനും ചലച്ചിത്ര നിരൂപകനുമായ കെ.ഗോപിനാഥന്, പ്രമുഖ സംവിധായകന് സുന്ദര്ദാസ് എന്നിവരാണ് പ്രാഥമിക വിധിനിര്ണയ സമിതിയിലെ രണ്ട് സബ് കമ്മിറ്റികളുടെ ചെയര്മാന്മാര്. ഇരുവരും അന്തിമ വിധിനിര്ണയ സമിതിയിലെ അംഗങ്ങളുമാണ്. ദൂരദര്ശന് മുന് ഡെപ്യൂട്ടി ഡയറക്ടറും ഡോക്യുമെന്ററി സംവിധായകനുമായ ബൈജു ചന്ദ്രന്, എഴുത്തുകാരും തിരക്കഥാകൃത്തുക്കളുമായ വി.ആര്.സുധീഷ്, സുസ്മേഷ് ചന്ത്രോത്ത്, സൗണ്ട് ഡിസൈനര് ജിസ്സി മൈക്കിള്, സംവിധായികയും തിരക്കഥാകൃത്തുമായ സംഗീത പത്മനാഭന്, ഛായാഗ്രാഹകന് വേണുഗോപാല് എന്നിവരാണ് പ്രാഥമിക വിധിനിര്ണയസമിതിയിലെ മറ്റ് അംഗങ്ങള്.
സയ്യിദ് മിര്സ, സുന്ദര്ദാസ്, കെ.ഗോപിനാഥന് എന്നിവര്ക്കു പുറമെ അന്തിമവിധിനിര്ണയ സമിതിയില് ഹിന്ദി സംവിധായകനും തിരക്കഥാകൃത്തുമായ സുരേഷ് ത്രിവേണി, ചലച്ചിത്രപിന്നണി ഗായിക ബോംബെ ജയശ്രീ, ഛായാഗ്രാഹകയും സംവിധായികയുമായ ഫൗസിയ ഫാത്തിമ, സൗണ്ട് ഡിസൈനര് ഹരീന്ദ്രനാഥ് ദ്വാരക് വാര്യര് എന്നിവരും അംഗങ്ങളാണ്. ചലച്ചിത്ര അക്കാദമി സെക്രട്ടറി സി.അജോയ് പ്രാഥമിക, അന്തിമ വിധിനിര്ണയ സമിതികളില് മെമ്ബര് സെക്രട്ടറിയായിണ്. പ്രാഥമികജൂറിയില് എട്ട് അംഗങ്ങളും അന്തിമ ജൂറിയില് ഏഴ് അംഗങ്ങളുമാണ് ഉള്ളത്.
ചലച്ചിത്രനിരൂപകന് വി.കെ ജോസഫ് ആണ് രചനാവിഭാഗം ജൂറിയുടെ ചെയര്മാന്. മാധ്യമപ്രവര്ത്തകയും എഴുത്തുകാരിയുമായ മനില സി.മോഹന്, ചലച്ചിത്രനിരൂപകനും തിരക്കഥാകൃത്തുമായ ഡോ.അജു കെ.നാരായണന്, സി.അജോയ് (മെമ്ബര് സെക്രട്ടറി) എന്നിവരാണ് മറ്റ് അംഗങ്ങള്.
