ദൈവാശ്രയബോധവും കഠിനാധ്വാനവുമാണ് മുഖമുദ്ര
ഇടുക്കിയുടെ ഹൃദയഭാഗത്തുള്ള കുഴിത്തൊളു എന്ന മലയോരഗ്രാമത്തിൽനിന്ന്, ജീവിതം സമ്മാനിച്ച എല്ലാ പ്രതിസന്ധികളെയും കഠിനാധ്വാനവും അചഞ്ചലമായ വിശ്വാസവുംകൊണ്ട് അതിജീവിച്ച്, വിജയത്തിന്റെ കൊടുമുടികൾ കീഴടക്കിയ ഒരു യുവപ്രതിഭയാണ് ഇസബെൽ മരിയ സെബാസ്റ്റ്യൻ. ഓരോ വിദ്യാർത്ഥിക്കും വഴികാട്ടിയും ഓരോ രക്ഷിതാവിനും അഭിമാനവുമാകുന്ന ഒരു പ്രചോദനാത്മകമായ ജീവിതയാത്രയാണ് ഇസബെലിന്റേത്.
വിശ്വാസത്തിന്റെ ചിറകിലേറി, കഠിനാധ്വാനത്തിന്റെ പാതയിൽ
ഇസബെലിന്റെ ഈ അസാധാരണ വിജയത്തിന് പിന്നിൽ രണ്ടു കാര്യങ്ങൾ ഉറച്ചുനിൽക്കുന്നു: ദൈവാശ്രയബോധവും നിരന്തരമായ പ്രയത്നവും. വിശുദ്ധ കുർബാനയോടുള്ള ആഴമായ സ്നേഹം കാരണം എല്ലാ ദിവസവും കുർബാനയിൽ പങ്കെടുക്കുകയും അൾത്ത ത്താരയിൽ ശുശ്രൂഷ ചെയ്യുകയും ചെയ്യുന്നതും ഇസബെലിന്റെ ജീവിതചര്യയാണ്. താൻ നേടിയെടുത്ത എല്ലാ നേട്ടങ്ങളും ഈശോയുടെ അനുഗ്രഹവും, മാതാപിതാക്കളായ സെബാസ്റ്റ്യൻ കെ.സി, ജിജി സെബാസ്റ്റ്യൻ എന്നിവരുടെ പ്രാർത്ഥനകളുടെ ഫലവുമാണെന്ന് ഇസബെൽ ഉറച്ചു വിശ്വസിക്കുന്നു. സഹോദരിമാരായ ഇവ അൽഫോൻസാ, ഇമൽ അൽഫോൻസ എന്നിവർ നൽകിയ അകമഴിഞ്ഞ പിന്തുണയും സ്നേഹവുമാണ് ഈ കുതിപ്പിന് ഊർജ്ജം പകർന്ന മറ്റൊരു ഘടകം. ഈ ആത്മീയശക്തിയും അർപ്പണബോധവുമാണ് ഏത് പ്രതിസന്ധികളെയും ചിരിച്ചുകൊണ്ട് നേരിടാൻ ഇസബെലിന് കരുത്ത് നൽകിയത്.
അറിവിന്റെ ലോകത്തെ തിളക്കമാർന്ന അധ്യായങ്ങൾ
വിദ്യാഭ്യാസരംഗത്ത് ഇസബെൽ കാഴ്ചവച്ചത് വിസ്മയിപ്പിക്കുന്ന പ്രകടനമാണ്. 2017-18 അധ്യയന വർഷത്തിൽ ദീപ ഹൈസ്കൂൾ, കുഴിത്തൊളുവിൽനിന്ന് പത്താംക്ലാസിൽ എല്ലാ വിഷയങ്ങളിലും A+ നേടിയാണ് ഇസബെൽ പഠനയാത്രയ്ക്ക് തുടക്കമിട്ടത്. തുടർന്ന് 2018-20 കാലയളവിൽ സെൻ്റ് മേരീസ് HSS, അറക്കുളത്ത് നിന്ന് ഹയർ സെക്കൻഡറിക്ക് 99% മാർക്കോടെ എല്ലാ വിഷയങ്ങളിലും A+ കരസ്ഥമാക്കി ആ മികവ് നിലനിർത്തി. ബിരുദ പഠനത്തിലും ഇതേ നിലവാരം തുടർന്നു. 2023-ൽ അസംപ്ഷൻ കോളേജ്, ചങ്ങനാശ്ശേരിയിൽ നിന്ന് B.Sc കെമിസ്ട്രിയിൽ ഒന്നാം സ്ഥാനം നേടി. പിന്നീട്, എം.ജി യൂണിവേഴ്സിറ്റി, കോട്ടയത്ത് നിന്ന് M.Sc കെമിസ്ട്രിക്ക് ഒന്നാം റാങ്ക് നേടി തന്റെ പഠനമികവ് ഒരിക്കൽക്കൂടി തെളിയിച്ചു. നിലവിൽ സെൻ്റ് തോമസ് ടീച്ചർ എഡ്യൂക്കേഷൻ കോളേജ്, പാലയിൽ B.Ed പഠനം തുടരുകയാണ് ഇസബെൽ.
അംഗീകാരങ്ങളുടെ പട്ടിക:
കഴിവുകൾക്ക് ലഭിച്ച അംഗീകാരം ഇസബെലിൻ്റെ അസാധാരണമായ കഴിവിനും കഠിനാധ്വാനത്തിനും നിരവധി അംഗീകാരങ്ങൾ ലഭിച്ചിട്ടുണ്ട്. മുഖ്യമന്ത്രിയുടെ വിദ്യാർത്ഥി മികവ് പുരസ്കാരം (Chief Minister’s Student Excellence Award) നേടിയ ഇസബെൽ, ഹൈസ്കൂൾ തലത്തിലെ മോഡൽ യൂത്ത് പാർലമെൻ്റ് മത്സരത്തിൽ മികച്ച പാർലമെന്റേറിയൻ ആയും തിരഞ്ഞെടുക്കപ്പെട്ടു.
